Devi Narayaniyam Dasakam - 1
yasminnidaṁ yata idaṁ yadidaṁ yadasmāt
uttīrṇarūpamabhipaśyati yatsamastam |
nō dr̥śyatē ca vacasāṁ manasaśca dūrē
yadbhāti cādimahasē praṇamāmi tasmai || 1-1 ||
na strī pumān na suradaityanarādayō na
klībaṁ na bhūtamapi karmaguṇādayaśca |
bhūmaṁstvamēva sadanādyavikāryanantaṁ
sarvaṁ tvayā jagadidaṁ vitataṁ vibhāti || 1-2 ||
rūpaṁ na tē:’pi bahurūpabhr̥dāttaśakti-
-rnāṭyaṁ tanōṣi naṭavatkhalu viśvaraṅgē |
varṣāṇi tē sarasanāṭyakalāvilīnā
bhaktā ahō sahr̥dayā kṣaṇavannayanti || 1-3 ||
rūpānusāri khalu nāma tatō budhaistvaṁ
dēvīti dēva iti cāsi nigadyamānā |
dēvyāṁ tvayīryasa umā kamalā:’tha vāg vā
dēvē tu ṣaṇmukha umāpatiracyutō vā || 1-4 ||
tvaṁ brahma śaktirapi dhātr̥ramēśarudraiḥ
brahmāṇḍasargaparipālanasaṁhr̥tīśca |
rājñīva kārayasi subhrū nijājñayaiva
bhaktēṣvananyaśaraṇēṣu kr̥pāvatī ca || 1-5 ||
mātā karōti tanayasya kr̥tē śubhāni
karmāṇi tasya patanē bhr̥śamēti duḥkham |
vr̥ddhau sukhaṁ ca tava karma na nāpi duḥkhaṁ
tvaṁ hyēva karmaphaladā jagatāṁ vidhātrī || 1-6 ||
sarvatra varṣasi dayāmata ēva vr̥ṣṭyā
siktaḥ subīja iva vr̥ddhimupaiti bhaktaḥ |
durbījavadvrajati nāśamabhakta ēva
tvaṁ nirghr̥ṇā na viṣamā na ca lōkamātaḥ || 1-7 ||
sarvōparīśvari vibhāti sudhāsamudra-
-stanmadhyataḥ parivr̥tē vividhaiḥ sudurgaiḥ |
chatrāyitē trijagatāṁ bhavatī maṇidvī-
-pākhyē śivē nijapadē hasitānanā:’:’stē || 1-8 ||
yastē pumānabhidadhāti mahattvamuccai-
-ryō nāma gāyati śr̥ṇōti ca tē vilajjaḥ |
yaścātanōti bhr̥śamātmanivēdanaṁ tē
sa svānyaghāni vidhunōti yathā tamō:’rkaḥ || 1-9 ||
tvāṁ nirguṇāṁ ca saguṇāṁ ca pumān viraktō
jānāti kiñcidapi nō viṣayēṣu saktaḥ |
jñēyā bhava tvamiha mē bhavatāpahantrīṁ
bhaktiṁ dadasva varadē paripāhi māṁ tvam || 1-10 ||
